Под слоганот #ЗеленаРеволиција, иницијатива Fridays for future Македонија в петок (29 ноември) најави марш за чист воздух, кој треба да започне од 17 часот од Министерството за животна средина и да заврши пред Владата.
-Додека светот бара решение за климатската криза, тука се соочуваме со незапаметено загадување на воздухот. Во овој токсичен амбиент повеќе од 3500 луѓе годишно умираат од болести поврзани со аерозагадувањето, а останатите гледаат што побрзо да ја напуштат државата. Причината за загадувањето кај нас, и за климатските промени пошироко, е иста: тотална подреденост на сите економски сектори на фосилните индустрии контролирани од бизнис елитите, и тотална незаинтересираност на политичките елити за било какво справување со овој неодржлив систем. Бараме радикална промена на политичките приоритети и радикална трансформација на општествено-економската поставеност, која ќе ја отфрли саможивата филозофија на владејачката класа и која ќе го стави обичниот човек на прво место.
Во спротивно, нашиот одговор ќе биде радикален. Во секојдневие кое се повеќе наликува на Чернобил, повеќе немаме што да изгубиме, се вели во повикот од активистите кои најавуваат дека од масовноста на овој протест зависи дали политичарите ќе го слушнат барањете за основни услови за живот со оглед на претстојните избори.
Животната средина е најголема преокупација на европските граѓани
Најновата анкета на јавното мислење на Фондацијата Бертелсман покажува дека вкупно 40 отсто од европските граѓани изјавиле дека заштитата на животната средина е најважната тема на која треба да се фокусира идната Европска Комисија.
На второ место, европските граѓани сметаат дека најважна политичка тема е вработеноста, а на трето место социјалната заштита.
Анкетирани се над 12 илјади граѓани во сите 27 земји членки на ЕУ, без Обединетото Кралство.
Резултатите се слични кога се анализираат по земји членки поединечно.
Германците, со 49 отсто, се најзагрижени за животната средина, следуваат Французите со 39 отсто, додека 36 отсто од Италијанците се загрижени за климата, но дури 60 отсто од нив изјавиле дека вработеноста е поголем приоритет од животната средина.
Полјаците се изјасниле со 36 отсто за работните места, а со 35 отсто за животната околина.
Конзистентно ширум ЕУ најниска стапка добиваат правата на малцинствата и еднаквите можности.
Климатските прашања се најголема преокупација кај младите Европејци помеѓу 16 и 25 годишна возраст. Друга голема преокупација за младата генерација е осаменоста, покажува анкетата на фондацијата Бертелсман. Младите се дупло повеќе загрижени за осаменоста отколку Европејците помеѓу 46 и 65 годишна возраст. За постарите генерации поважно е прашањето за социјалната заштита.