Почина истакнатиот македонски композитор, диригент, маестро Александар Џамбазов, објави Сојузот на композитори на Македонија (СОКОМ), чиј долгогодишен член беше Џамбазов.
Џамбазов, се вели во соопштението на СОКОМ, е втемелувач на македонската детска и популарна музика со голем број на изведени, снимени и печатени и наградени дела во земјата и во странство, истакнат општествен деец во целокупната музичка култура, за што е добитник над 40 стручни и општествени награди и признанија во Македонија и во поранешна СФР Југославија. Добитник е на Државната награда „11 Октомври“, наградата на град Скопје „13 Ноември” и др.
Маестро Александар Џамбазов е еден од основоположниците на Танцовиот и Ревискиот оркестар на Македонската Радио Телевизија, на фестивалот на забавни мелодии „Скопје“ и на најпознатиот, најафирмиран и еден од најстарите музичко-детски фестивали во Европа „Златно славејче“.
Неговиот исклучителен придонес е и во музичкото исполнителство, како диригент со над 40-годишен непрекинат и континуиран работен стаж, и како несебичен пропагатор на опусот на македонските композитори од овој жанр. Во неговиот богат творечки и интерпретавен опус се обединети сите негови животни и креативни настојувања на взаемно преточување на „сериозниот” и „популарниот” жанр врз кои базира целото негово творештво што опфаќа оркестарски, хорски, камерни дела, забавни мелодии, песни за деца, музика за филм и за театарски претстави.
Александар Џамбазов е роден на 3 февруари во 1936 година во село Стапар, Војводина, Р. Србија. Во 1947 година во Скопје го завршува најпрво нижото музичко училиште (започнато во Штип) и средното – 1956 година. Истата година се запишува на Музичката академија во Белград, каде дипломира во 1960 година.
Веднаш по дипломирањето поканет е да работи во Радио Скопје, и тоа најпрвин како соработник во Редакцијата за сериозна музика, потоа во Редакција на забавна музика и музичката продукција, а од 1964 година е назначен за диригент на Танцовиот оркестар на РТВ Скопје на кое работно место се наоѓа до неговото пензионирање.