Втор по број на настапи за фудбалската репрезентација на Англија и најдобар стрелец во историјата на англискиот национален тим – со овие факти, фудбалерот Вејн Руни ја заврши кариерата во дресот на Гордиот Албион, откако денеска најави пензионирање.
По летниот трансфер од Манчестер Јунајтед во клубот од детството Евертон, Руни ја започна сезоната на најдобар можен начин, постигнувајќи голови и асистирајќи на своите колеги од клубот од Ливерпул, и откако се најде на листата на играчи кои националниот стратег Герет Саутгејт ги повика за следниот меч на Англија, тој експресно најави повлекување од репрезентативниот дрес.
Вејн Руни има 53 погодоци во 119 настапи за Англија.
„Супер е што Герет Саутгејт ме повика неделава за да ми каже дека сака да се вратам во репрезентацијата за наредните два меча, навистина ми значи тоа. Но подолго размислував и го известив тренерот дека се повлекувам од националниот тим. Ова е тешка одлука за мене но за ова разговарав и со семејството и со мојот тренер во Евертон и сите блиски“, изјави Руни.
Како што вели тој, секогаш со гордост го носел дресот на Англија .
„Настапите за Англија секогаш беа специјални за мене. Секој пат кога бев одбран да играм или да бидам капитен, за мене беше привилегија и упатувам огромна благодарност за сите кои ми помогнаа. Ќе останам страствен навивач на Англија“, вели Руни во изјавата.
Англискиот доскорашен капитен дебито за својата држава го имаше во 2003 година против Австралија и оттогаш настапуваше на три Светски првенства и три Европски првенства во фудбал.
Никогаш во својата интернационална кариера не подигна трофеј, а најдобриот пласман со Англија му беше четврт-финалето во 2006 година на Светското првенство.