-Ако не ми беше мирна совеста, немаше да го потпишам Договорот и немаше денеска да бидам овде пред вас, рече министерот за надворешни работи Никола Димитров пред членовите на Комисијата за европски прашања на која се дебатираше за Предлог – законот за ратификација на Договорот меѓу Македонија и Грција.
Димитров кажа дека e очигледно зошто Предлог – законот е предложен по скратена постапка, кога остануваат уште само неколку дена до Советот за општи работи на министите за надворешни работи што ќе се одржи во вторник во Луксембург, а до тогаш треба да биде ратификуван Договорот во Собранието.
Европското знаменце е затоа што со оваа Спогодба се обидуваме да ја отвориме вратата која со години беше заклучена, кажа Димитров.
-Не исклучувам дека во минатото сме можеле да добиеме и подобри решенија, но огромна е одговорноста зошто не сме загризале. Резултатот е изгубена генерација. Одговорноста за пропуштените шанси е огромна, додаде Димитров.
Спогодбата не е совршена и идеална, туку е израз на компромиси меѓу двете страни. „Кога опозициите во двете држави велат дека е срамна и капитулантска, тоа укажува дека се работи за компромис, рече Димитров.
Со Договорот, објасни Димитров, Македонија го зачувува идентитетот, а Грција ја доби дистинкцијата меѓу регионот Македонија и Република Македонија.
Опозицијата не беше на седницата на Комисијата за европски прашања, но Димитров упати и порака до нив.
-Раководството што не пикна во дупка и ни ја направи работатата уште потешка, не само што не помага, туку и одмага. Што правеа толку години, кој им бранеше да го отворат процесот? Тогаш, патот кон ЕУ беше и многу поасфалтиран од сега, но на што мислеа тие? Не пикнаа во дупка и сега кога излегуваме на површина, чесно е барем да не одмагаат, кажа Димитров.
– Дали ова значи менување на името или додавање на одредница, праша Димитров и додаде „Северна е географска одредница, придавка пред именката Македонија“.
Во однос на опфатот на името, Димитров кажа дека „без ова прашање ќе немавме спогодба“ и дека името и опсегот секогаш биле поврзани.
Државјанството или nationality ќе биде Македонско/граѓани на Северна Македонија.
За целиот договор, како што рече, народот ќе се изјасни на рефрендум, на кој граѓаните сами ќе се определат за својата иднина.
-Во минатото, за митологијата ја жртвуваме реалноста, сега ја жртвуваме митологијата за реалноста, рече Димитров.
Предлог- законот за ратификација на Договорот со Грција беше изгласан на Комисијата за европски прашања, а потоа и на Комисијата за законодавство.
Утре Договорот ќе се најде на ратификација и пред пратениците во Собранието, по што се очекува Грција да испрати известување до ЕУ дека повеќе нема пречки земјава да добие датум за отпочнување на преговорите.
Претходно денеска, со 69 гласа За, пратениците гласаа, овој предлог закон да биде донесен по скратена постапка. Четириесет пратеници беа против. ВМРО ДПМНЕ соопшти дека нема да учествуваа на оваа седницата на која ќе се расправа за ратификацијата на Договорот.