Џихадистите од исламистичката сунитска група Исламска држава (ИД), на интернет објавија видео снимка на која е прикажано убивањето на американскиот новинар Џејмс Фоли, кој беше заробен од исламистите во Сирија пред крајот на 2012 година.
Во соопштението на припадниците од таканаречената Исламска држава се вели дека убиството на Фоли со отсечување на главата е „одмазда за американското бомбардирање“ врз позициите на Исламската држава во Северен Ирак.
Засега нема независна потврда за јавната ликвидација на новинарот, ниту за оригиналноста на видео снимката.
Видео снимката е означена како „Порака до Америка“ и таа треба да биде “предупредување до САД за одмазничките акции против американските интереси и против Американците во регионот како одмазда за американското мешање во Северен Ирак’.
Во тој дел од земјата, припадниците на ИД на просторот што го имаат претходно освоено настојуваат да созададат исламсистички калифат.
Џејмс Фоли е подолго време присутен на Блискиот Исток, работејќи како известувач за разни весници и новински агенции, вклучувајќи ја и француската АФП.
На крајот од видеото џихадистот го прикажува новинарот Стивен Сотлоф кој известува од Блискиот Исток за весникот ТАЈМ велејќи дека тој ќе биде следната жртва доколку претседателот на САД, Барак Обама не ја повлече својата одлука.
„Одлуката е твоја Обама, дали овој новинар ќе биде следната жртва“, вели тој.