“Историската и структурна нееднаквост дозволија процут на дискриминацијата како што никогаш досега”, порача генералниот секретар на Обединетите Нации Антонио Гутереш во своето обраќање по повод Меѓународниот ден на правата на жените.
Гутереш вели дека дискриминацијата кон жените е широко распространета, дека мажот е се уште суверен во многу култури и дека тоа се случува на пазарот на трудот, во кинематографијата, социјалните мрежи и во сите делови на светот.
“Активизмот на жените даде резултати. Поголем број девојчиња посетуваат училиште; се поголем број жени имаат добро платена работа и заземаат високи позиции во приватниот сектор, академската сфера, политиката и меѓународните организации, вклучително и ОН. Родовата рамноправност е втемелена во безброј закони, а штетните пракси, како сакатењето на женските гениталии и детските бракови, во многу држави се забранети. Но, треба да ги отстраниме сериозните препреки ако сакаме да ја надминеме историската нерамнотежа на моќ, што е основа за дискриминација и експлоатација”, посочи Гутереш.
Повеќе од милијарда жени во светот се лишени од правна заштита во случај на семејно насилство. Разликата меѓу приходите на мажите и жените изнесува 23 отсто, а во руралните средини се движи и до 40 отсто. Голем број на жени немаат никакви примања, порача Гутереш.
Тој во својот говор се осврна и на сексуалното насилство во семејството, истакнувајќи дека над една милијарда жени во светот не се со закон заштитени од таквиот вид насилство.
“Дури и таму каде постојат закони, често не се почитуваат, а жените кои бараат правна заштита често наидуваат на сомнеж, осуда и омаловажување. Денес знаеме дека сексуалното вознемирување и злоставување се присутни на работното место, во јавниот простор и во домот, и тоа во држави кои се гордеат со своите резултати во областа на родовата рамноправност. ОН треба да бидат пример во целиот свет”, наведе Гутереш.
Тој нагласи дека инвестирањето во жените е најефикасното средство за економски напредок во општеството и компаниите, и порача дека инклузијата на жените би допринела за полесно склучување на мировни договори и јакнење на економијата во светот.
“Време мажите да почнат да ги поддржуваат, да ги слушаат жените и да учат од нив”, заклучува тој.