Хаштагот Радио Лондон (на француски #RadioLondres) денес, по пет години пауза, денес повторно се појави на Твитер. Неговите над 55 илјади следачи се надеваат дека Радио Лондон ќе биде најбрз во објавувањето на имињата на двајца финалисти во првиот круг на француските претседателски избори.
Сите кои учеле за Втората светска војна знаат дека Радио Лондон беше слободната радио станица која Би-Би-Си ја отвори во Лондон наменета за Франција која тогаш беше окупирана од нацистите. Радио станицата беше на француски јазик а ја водеа Французи кои успеале да се избегаат од окупаторот. Радио Лондон успешно ја демантираше нацистичката пропаганда и ги повика Французите да се кренат против окупаторот.
Денес нема војна и нема окупатор но постои закон во земјата со кој на француските медиуми им е забрането да објавуваат било што поврзано со изборите додека трае изборниот ден. Непочитувањето чини 75.000 евра. Па така лесно ќе разберете дека ниту најбогатите француски медиуми молчат се до 20 часот кога сите го објавуваат името на победникот.
Но интернетот го донесе Радио Лондон, приватна иницијатива зад која стоји Иго Траверс кој има 20 години и е студент на втора година на политички науки. Во 2012 година тој го измисли #RadioLondres , граѓански медиум како што го нарекува неговиот основач.
Иго и неговите пријатели лесно ракуваат со интернет и самите собираат податоци од гласачите кои излегуваат од избирачките места. Годинава одлучија на јутјуб во “живо” да ги покриваат изборите под хаштагот #ElyséeLive:
Забраната за објавување важи и за интернет медиумите. Радио Лондон најде начин како да се провлече низ законската мрежа и објавува шифрирани пораки полни со хумор.
Така во 2012 година, кога кандидати за претседател беа Франсоа Оланд и Никола Саркози, #RadioLondres напиша дека темпратурите изнесуваат 27 степени во Холандија и 25 во Унгарија. Името на Оланд на француски се пишува исто како и државата Холандија а унгарската референца се однесуваше на Саркози поради неговото унгарско потекло.
И годинава кандидатите имаат шифрирани имиња. Така Емануел Макрон го доби името Ротшилд поради тоа што работел во истоимена банка или Стив Џобс , Франсоа Фијон е Бајо Паторот (Пиксу на француски) со игра на зборови (Пиксу е името на познатиот цртан јунак а на француски значи крадење пари поради скандалите кои се провлекуваа низ неговата кампања), радикално левиот Жан-Лук Меланшон е Кастро или Че Гевара а екстремната десничарка Марин Ле Пен го доби името Фрексита поради нејзините ветувања дека ќе ја извади Франција од ЕУ.