Трет ден после насилните протести во Босна и Херцеговина на интернет се појавија снимки од недолични постапки на полицијата која со своето однесување допринесе кон распламтување на насилството во Тузла и во Сараево.
Откако во неделата на интернет се прошири видео снимка на која јасно се гледа како полицијата со пендреци ги тепа демонстрантите кои спасот го најдоа во скокање на брегот на реката Миљачка, од Тузла се појави и ново видео на кое се гледа како полицаец собира камења од земјата и ги фрла кон демнострантите.
Демонстрантите во Босна најавија за денеска на пладне нови протести во Сараево. Демонстрациите ги најави неформалната група на граѓани кои на улиците на главниот град се собраа во неделата и побараа пуштање на слобода на притворените лица. Нивното главно барање е оставка на Владата на Федерацијата БИХ.
После Сеад Чаушевиќ од Тузланскиот кантон, Муниб Хусејнагиќ од Зеничко-добојскиот, па Сеад Жељковиќ од Сараевскиот кантон, премиерот на Унско- санскиот кантон Хамди Липовиќ е четвртиот премиер кој си поднесе оставка после бранот на демонстрации низ федерацијата БИХ. Денеска е хакирана интернет страницата на Унско- санскиот кантон каде беше оставена следната порака:
Од вкупно 33 приведени демонстранти во Сараево се пуштени на слобода 23, а останатите 10 се задржани на распит и против нив ќе бидат покренати соодветни кривични пријави. Судот им дозволи да се бранат од слобода.
Демонстрантите бараат смена на владеачката структура на Федерацијата Босна и Херцеговина, на чело со премиерот Нерман Никшиќ кој рече дека е подготвен за оставка ако постои ново парламентарно мнозинство.