Продолжува објавата на детали за тоа како тројцата македонски граѓани кај местото Посиди на првиот крак на Халкидики влегле да пливаат и како едниот од нив-25 годишно момче, било спасено наводно од сурфер и извлечено на брегот.
Било констатирано дека момчето имало испиено поголемо количество од морската вода, но дека е во стабилна состојба, констатирале медицинските екипи кои со возило на грчката Брза помош го земале 25 годишното момче од крајбрежјето на Посиди.
Без резултат е досегашната потрага во текот на ноќта по останатите двајца едниот на 28 другиот на 30 години, исто така македонски граѓани, јавуваат грчките медиуми. Па затоа спасувачката акција продолжува и денеска како во море така и од воздух.
Временските услови, според грчката крајбрежна стража , не им оделе во прилог на трагачите зашто имало ветер со јачина од 6 бофори или околу 40 километри на час, иако во акцијата се вклучени чамци, бродови и хеликоптери.
Дека ова место на Посиди било со специфична ружа на ветрови и кај кое постојано се појавувале морски струи и големи бранови, мештаните знаеле одамна и затоа се сметало за опасно место. Ова синоќа го изјави градоначалничката на Касандра, Анастасиа Халкиа која поради овие причини информира дека е невозможно потрагата да трае и во текот на ноќта.
Според дел од медиумите , тројцата македонски граѓани, дошле во Посиди да прослават роденден, според други славеле раѓање на дете. И по журката на плажата влегле да се искапат кога и ги повлекле морските струи и бранови, по што едниот, најмладиот бил спасен а потрагата по останатите двајца почнала околу 19 часот по локално време.
Од Крајбрежната служба на Грција за дописничката на МИА од Атина вчера потврдија дека спасениот е од Северна Македонија и станува збор за 25-годишно момче, кое е во добра здравствена состојба.
Досега македонското МНР, и покрај интересот од медиумите нема излезено со информација со која би го потврдило случајот со тројцата туристи во Грција.
(М. Т.)