Лидерот на Српската радикална партија Воислав Шешељ најави враќање на српската политичка сцена.
Иако само привремено ослободен од Хашкиот Трибунал поради влошената здравствена состојба, во своето прво обраќање во Белград, Шешељ најави намера да ја урне актуелната власт во Србија.
„Браќа и сестри, Хашкиот трибунал на брутален начин ме исфрли од ќелијата во Шевенинген. Ниту барав, ниту поставија некои услови, туку сакаа што побрзо да се ослободат од мене“, рече Шешељ.
Дополни дека првичната цел му е соборување на актуелниот претседател Томислав Николиќ и премиерот Александар Вучиќ.
„Тоа привремено ќе трае се додека радикалите не ги соборат Томислав Николиќ и Александар Вучиќ, отпадниците и српските предавници, кои ја продадоа својата чест и карактер и станаа слуги на западните сили. Кога предавничката Напредна партија дојде на власт, ниту еднаш не го поставија прашањето за нелегалноста на Хашкиот трибунал“, рече Шешељ пред приврзанициците во Земун.