Болно, изнемоштено лице утрово со хеликоптер било евакуирано од селото Галичник и пренесено во ГОБ „8 Септември“.
Акцијата била изведена од Специјалната антитерористичка единица „Тигар“, во содејство со Хеликоптерската единица на МВР, а по повик примен во Центарот за управување со кризи.
„Припадниците на специјализираниот алпинистички тим на САЕ Тигар заедно со колегите од Хеликоптерската единица во периодот од 07.00 до 10.00 часот извлекоа жител на село Галичник, а поради снежните навеви на патиштата кон селото, тимот на САЕ„Тигар“ беше принуден да се спушти на локацијата во Галичник, користејќи специјална опрема за спуштање и кревање од хеликоптер. Од страна на полициските службеници лицето беше подготвено за транспорт, ставено во хеликоптер и транспортирано до ГОБ „8 Септември“ во Скопје, каде беше предадено за укажување на медицинска помош“, се вели во дописот на МВР.
За потсетување, Специјалната антитерористичка единица „Тигар“ при МВР е наменета за извршување на специјални полициски и антитерористички задачи. Покрај основната намена, специјализираните тимови на единицата се користат и за извршување на спасувачки мисии при сложени услови на тешко пристапен терен.