Новиот највисок претставник на студентите, претседателот на СПУКМ, денеска се избира во сомнителни околности, на избори на кои студентите гласаат без параван за заштита на тајноста на гласот и на гласачки ливчиња кои наликуваат на флаер кој може секој да го изработи, бидејќи на нив нема ниту регистарски број.
Токму ова е причината за денешната расправа помеѓу Студентскиот пленум и комисијата на СПУКМ, која одби да се легитимира кога тоа беше побарано од нив. Збунетата комисија од студенти пак, не знаеше да одговори зошто немаат паравани за таен глас.
Комисијата не одговараше ниту пред новинарите ниту пред Студентскиот пленум за тоа колкава е излезеноста за изборот помеѓу двајцата кандидати Стефан Василевски и Давор Поповски а некои студенти не ги ни легитимираше и истите јавно гласаа, што наиде на саркастични ракоплескања од оние кои бојкотираа.
Но она што најмногу ги изненади студентите кои се дел од Студентскиот пленум, беше изјавата на првиот студент кој треба да застане во нивна одбрана. Студентката на Правниот факултет, студентскиот правобранител Васка Бојаџи пред да гласа во овие околности, повикувајќи се на Статутот на УКИМ и СПУКМ, ги повика останатите студенти да го сторат тоа во како што рече таа, мирна и пријатна атмосфера.
И нејзината изјава наиде на симболично ракоплескање од Студентскиот пленум на кој таа им порача дека ако имаат забелешки, да се жалат писмено до неа. Бојаџи гласаше без да го коментира недостатокот од параван, се легитимираше, и својот глас го прикри со папка.
Слична беше и реакцијата на в.д претседателот на СПУКМ, Кирил Спировски. Тој немаше објаснување ниту коментар за комисијата пред која се спроведуваат изборите, бидејќи не биле под негова надлежност, за потоа да продолжат со меѓусебни обвинувања со претставничката на Пленумот, Ивана Туфегџиќ.
Изборите на кои се гласа на 23 факултети од Универзитетот „Кирил и Методиј“ се отворени до 16 часот.