Ноќеска повторно избувна бунт во Центарот за мигранти во Гази Баба. На видеото кое го испратија граѓани што живеат во близина, се слуша викање и тропање во прифатилиштето. Мигрантите извикуваат „Сакаме слобода“.
Мигрантите кои се сметени во импровизираниот Центар, кој порано беше детска градинка бараат да бидат преместени во Центарот за азил во Визбегово.
Вчера полицијата успеа да го смири бунтот со ветување дека ќе ја забрзаат постапката за префрлување таму. Екипа од институцијата Народен правобранител веднаш замина таму и започна опсежна истрага за состојбата во Центарот.
До пладне во Центарот беа сместени околу 270 бегалци, меѓу кои 60 жени и деца, иако капацитетот е за 140 луѓе. Вечерта таму се донесени уште 120 мигранти кои полицијата ги пронајде во Ваксинце.
„Таму наидовме на многу лоша состојба, луѓето нема каде да спијат, лежат по ходници, не може да излезат надвор да земат воздух, се гушат внатре. Мигрантите таму фактички се како во притвор, бидејќи органите на прогонот ги држат како сведоци во судски постапки против кријумчарите“, изјави за НОВА, Аница Томшиќ Стојковска советничка за превентива од тортура на Народниот правобранител.
Во крајно нечовечки услови во Прифатниот центар за странци во Гази Баба мигрантите-бегалци, поминуваат по неколку месеци на нивниот пат по подобар живот.
Народниот правобранител за денеска најави прес конференција за актуелната состојба со бегалците.
ПОВТОРНО БУНТ ВО ГАЗИ БАБА -.прифатниот центар за странци!
Posted by Mersiha Smailovic on четврток, 11 јуни 2015