Золтан Пушкаш, новосадскиот актер и режисер со театарот „Увидјеки Синхаз“ од Нови Сад со „ОФФ – Надминување на границите“ се на сцената во МКЦ во сабота во 20.00 часот.
Во претставата се отвораат повеќе дилеми. Во случај кога градската власт ќе ги фати за врат и невидливите раце ја укинат уметноста и наместо неа пласираат празни зборови, што можат да направат актерите? Можат да застанат на сцената и да зборуваат. За себе, за светот, за театарот. Можат да врескаат кон небото и да го забодуваат бесот во земјата. Можат да се фатат за поезија, да се смеат, да зборуваат за заедништвото, државата, за светот и системот или со стегната тупаница да зададат удар. Ќе ги надминат ли границите?
Во 22.00 часот во МКЦ, следи соло танц перформанс на танчарката и кореографка Маура Моралес од Куба. Wunschkonzert е инспириран од истоимената драма на Франц Ксавер Кроц од 1971 година, и ја открива потребата на една жена за сензуален живот исполнет со среќа, восхит и реализирани соништа, надвор од секојдневната монотонија, осаменост и копнеж. Низ умешна кореографија и кревки итри движења, Моралес внимателно го отвора просторот за да ги открие длабочините на човечката душа.
Кооператива Маура Моралес е трупа што се занимава со современ танц, а ја предводат танчарката и кореографка Маура Моралес и гитаристот, композитор и уметник на звук, Мичио. Трупата, која постои од 2010 година, има поставено голем број продукции што редовно се изведуваат на престижни меѓународни фестивали низ Европа, Азија и Јужна Америка.
Во рамките на МОТ+ програмата во 18.00 часот во МКЦ галерија е промоција на книгата Рапсодија за театарот на Алeн Бадју, филозоф, драматург, професор на престижната École Normale Supérieure во Париз и еден од највлијателните мислители на денешницата. Роден е во 1937 во Рабат, Мароко, од раната младост е политички активен, пред сѐ во антиколонијалната борба во Алжир, а подоцна во текот на 1968 година во својата филозофија го испитува односот помеѓу субјективизмот и онтологијата.
Недела е резервирана за таканаречен македонски ден на МОТ. Во 19.00 часот во МКЦ е „Без наслов – (Симбол)“ на Скопје танцов театар. Проектот е на кореографите Андријана Данческа и Александра Петрушевска, а покрај нив играат и Валентино Апостоловски и Анастасија Данчевска.
Во 20.00 часот во МКЦ, Националиот театар од Косово ќе ја изведе „Коските што доаѓаат доцна“ на Теки Дервиши, а во режија на нашиот Мартин Кочовски. Станува збор за една од најдобрите модерни драми напишана од страна на косовски драмски писател, која се занимава со судбината на индивидуата со изгубен идентитет. Ги прикажува односите помеѓу човек што во потрага за моќ го загубил идентитетот и друг човек, кој се обидува да го зачува идентитетот во предизвикувачката орвеловска реалност и околностите во кои е присилно доведен. Во претставата игра и нашиот познат актер Бајруш Мјаку.
Оваа вечер завршува со независниот проект независниот проект „Да го поздравиш и да ми го бациш“ кој почнува во 22.00 часот во МКЦ. „Да го поздравиш и да ми го бациш“ е документарна претстава, авторско дело на четворица актери и еден режисер. Претставата е во режија на Билјана Радиноска, а во неа играат Бојан Кирковски, Наташа Петровиќ, Ненад Митевски и Симона Спировска Костовска.
Претставата не е наменета за лица под 16 години!