Случајот со 63 годишниот Златко Божинов не престанува да ја бранува јавноста. Граѓаните очекуваат да се лоцира одговорност кај институциите кои потфрлија во спасувањето на овчарот кој 12 часа завеан во снег чекаше помош од надлежните. Телото на премрзнатиот Божинов неколку часа го греела неговата 90 годишна мајка, а дури пет часа бил носен на импровизирана носилка за да биде префрлен во болница. Неколку часа подоцна почина како последица на обилно мозочно крварење.
Ова го уклучи алармот дека постои сериозен проблем кај надлежните институции кои почнаа да си ја префрлаат меѓу себе топката за тоа кој потфрлил во овој случај.
Од општината излегоа со соопштение дека немале теренско возило кое би можело да пристапи до непристапниот терен, директорот на ЦУК пак вели дека имало кршење на процедурите во системот за спасување, а за оперативецот од Кратово рече дека не побарал хеликоптер да помогне во спасувањето.
Министерот за внатрешни работи пак со став дека одговорноста мора да се лоцира и да се детектираат сите недоследности и пропусти со цел во иднина да не се случи повторно немил настан како овој.
Центарот за управување со кризи меѓувреме формираше комисија која треба да утврди каде потфрлиле институциите и да се отпочне со големи промени во целиот систем за спасување.
Најави дека на средината на јуни ќе започне со работа европскиот број 112, за кој Европската унија донирала 1,5 милион евра, а набавена е и опрема и завршена е обука за лицата кои ќе работат на овој број.
Вчера со реакции на фејсбук се огласија и вицепремиер за борба против корупција и криминал Љупчо Николовски и вицепремиер за европски прашања Никола Димитров. И двајцата рекоа дека човечкиот живот нема цена, а кога станува збор за спасување, секој треба да го даде максимумот, а не да се оградува од одговорност…
Димитров побара конкретна одговорност и рече дека случајот не смее да помине без сериозни системски промени…