Изречена пресуда за обвинетите во случајот „Трезот“ кој се однесува на набавката на систем за следење на комуникациите за потребите на УБК, чиј директор тогаш беше Сашо Мијалков, кој е и првообвинет во случајот.
Според пресудата изречена е казна затвор во вкупно траење од 33 години односно за директор на УБК Сашо Мијалков единствена казна затвор од 8 години, за поранешниот шеф на неговиот кабинет Тони Јакимовски единствена казна затвор од 5 години, за поранешниот помошник-министер во МВР Небојша Стајковиќ казна затвор од 5 години, а поранешениот началник на Петтата управа во МВР Горан Грујевски на кого му се судеше во отсуство судот го осуди на казна во траење од 15 години.
Случајот „Трезор“ го води судијката Џенета Бегтовиќ, а застапник на обвинението е ОЈО за организиран криминал, кое го презема предметот од поранешното СЈО.
Завршните зборови траеја повеќе од еден час, а пред изрекување на пресудата, согласно ковид-протоколите, судијката Бегтовиќ даде пауза од 15 минути за да се проветри просторијата.
Предметот се однесува на злоупотреба на средства од Буџетот на државата за набавка на електронско-комуникациска опрема за потребите на Петтата управа при УБК и обука за нејзино користење од фирма од Велика Британија.
Во завршниот збор, Обвинителството истакна дека наместо МВР да направи директна набавка на електронско-комуникациска опрема за потребите на Петтата управа при УБК од фирмата ГАМА од Велика Британија, како најекономичен начин, тие договориле набавката да се изврши преку друга фирма – посредник Финзи ДООЕЛ Скопје, со што успеале да злоупотребат средства од буџетот на државата.
Според обвинението, во овој случај се злоупотребени над 860 илјади евра.