Владата на Северна Македонија ги демантира и ги отфрла како невистинити тврдењата на пратеникот Антонио Милошоски дека наводно „премиерот Зоран Заев и министерот Оливер Спасовски делеле македонски пасоши на терористи од ИСИС“.
Од Владата бараат опозициската ВМРО-ДПМНЕ да престане да ги саботира успешните акции на Министерството за внатрешни работи.
-Ова е брутална лага која има за цел да ја манипулира јавноста, да попречува случајот да се расчисти до крај и да направи штета на угледот на институциите кои посветено и успешно се справуваат со секаков вид криминал, велат од владината прес служна.
Оттаму уште еднаш потенцираа дека токму челниците на ВМРО – ДПМНЕ неколку дена пред да бидат соопштени резултатите од акцијата започнале да ја саботираат истата.
Тоа го прават и деновиве, посочуваат од Владата, и со тоа, како што велат, сериозно и неодговорно се обидуваат да го загрозуваат процесот преку доведување на јавноста во заблуда со лаги.
-Владата очекува Обвинителството да расчисти со овие обиди за саботажа. Остануваме посветени на бескомпромисна борба со организираниот криминал и корупција и во таа насока продолжува и соработката со нашите стратешки партнери, се вели во соопштението од владината прес-служба.