Има задоволителна количина прехранбени производи и нафтени деривати во стоковните резерви, соопшти Владата денес, повикувајќи ги граѓаните на смиреност.
“Не се очекува ценовен шок на основните прехранбени производи. Владата и државните институции ја следат состојбата на дневна основа и ги преземаат сите мерки за да се зачува стандардот на граѓаните”, се вели во соопштението.
Се додава и дека во моментов нема потреба да се стават во функција стоковите резерви, и дека производителите имаат залихи на основни производи за период од над 35 дена, не вклучувајќи ги деновите со кои може да се покриваме преку државните резерви.
Владата апелира и трговците да ја почитуваат владината одлука за трговските маржи.
“Граѓаните да бидат сигурни и во најавите на Централната банка која изминатите денови информираше дека девизниот курс на денарот е стабилен и таков ќе остане. Девизните резерви изнесуваат околу 3,4 милијарди евра што е двојно повисоко ниво во однос на 2008 година на глобалната финансиска криза”, се вели во соопштението.