Премиерот Никола Груевски денеска најави конкретна операционализација на проектот за гасификација на Република Македонија.
„Се работи за проект кој се однесува на целата држава кој ќе биде изведен по сите стандарди, не парцијално туку интегрално, без импровизации туку со цврсти планови и програми. Беа потребни многу подготовки, изработка на мега проекти на кои се работеше со години, средување на имотно правни и земјишни односи, правење на многу анализи, и секако најбитното, требаше да се обезбеди темел, во оваа смисла на зборот да се обезбеди договор за снабдување со гас на Република Македонија“, реча премиерот.
„Обезбедивме договор со Руската Федерација за снабдување со гас, и го реализиравме клучниот предуслов да може да се започне со проектот за гасификација на Република Македонија. Овој проект предвидува гасификација на целата земја, на трите региони кои се определени за оваа намена, а се започнува со скопскиот регион“, потенцираше Груевски.
Според него со проектот ќе бидат опфатени сите 17 општини во скопскиот регион и тоа општините: Аеродром, Бутел, Гази Баба, Ѓорче Петров, Карпош, Кисела Вода, Сарај, Чаир, Центар, Општина Шуто Оризари, Сопиште, Студеничани, Зелениково, Петровец, Арачиново, Илинден и Чучер-Сандево.
Реализацијата на проектот ќе се одвива во период од 20 години при што во првите пет години треба и ќе се реализираат подготвителните работи и изградбата на мрежата.
Предвидена е изградба на околу 250 километри примарна дистрибутивна мрежа, при што во првите пет години од потпишување на договорот ќе биде задолжително да се изгради најмалку 70%, односно 175 километри од целата предвидена дистрибутивна мрежа, и тоа со обврска да биде изградена најмалку по 51% од предвидената мрежа во општините Аеродром, Центар, Кисела Вода, Карпош, Ѓорче Петров, Гази Баба, Чаир и Бутел и најмалку по 20% во секоја од останатите помали општини од скопскиот регион поединечно. Останатиот дел до задолжителните 70% ќе ги определи приватниот партнер во зависност од динамиката на приклучување на територијата на 17-те општини и од интересот за приклучување, во консултација со државата.
Периодот на примарна градба е 5 години, приклучувањето на објектите и испораката на природен гас е предвидено да започне веќе во втората година од градбата на системот. Изградбата би се одвивала во периодот од 2015 до 2019 година, меѓутоа дел од дистрибутивниот систем за природен гас ќе биде пуштен во работа веќе во 2016 година.
Владата бара приватен партнер кој има искуство во оперирање со дистрибутивни системи за природен гас во урбани средини подолго од 5 години, потоа системите за дистрибуција на природен гас со кој оперира треба да имаат повеќе од 40.000 корисници и
Да има вкупен годишен приход не помал од 40 милиони евра на годишно ниво.
Исто така, приватниот партнер ќе биде задолжен да овозможи секој заинтересиран корисник да плати приклучна такса од 1,25 евра по метар квадратен станбен простор или 100 евра за станбена единица од 80 м2. За куќа од 240м2 приклучната такса би изнесувала околу 300 евра. Приклучната такса за комерцијалните објекти ќе биде исто 1,25 евра по метар квадратен корисна површина.
Анализите во студијата, кои ги презентираше Груевски, покажуваат дека стан од 80м2 ако користи природен гас за една грејна сезона има намалување на трошоците од 24% во однос доколку користи парно, 7% доколку користи дрво, 54% доколку користи екстра лесно гориво, 51 % доколку користи течен компримиран гас и 35% доколку користи електрична енергија за затоплување. Слични вакви податоци и параметри важат и за помалите комерцијални објекти со моќност од 10KW.