Владата ја утврди најголемата трговска маржа за основните прехранбени производи во трговијата на големо и во трговијата на мало. Одлуката која стапува утре по излегувањето во Службен весник, важи до 30 септември, изјави министерот Крешник Бектеши.
„Од утре заклучно со 30 септември за цел бел леб, бел леб сечен на парчиња, бел шеќер и сончогледово масло за јадење, највисоката трговска маржа во трговијата на големо и на мало е 5 отсто. За брашно од пченица тип 400 и тип 500 за макарони и шпагети од тврда пченица , за бел ориз и млеко се утврдува највисока трговска маржа од 10 отсто во трговијата на големо и во трговијата на мало, изјави министерот Бектеши.
Како важна одлука која ќе трае до крајот на годината, во делот на формирањето на цените, Владата ја донесе одлуката со која нема да се пресметува рабат и никакви дополнителни оперативни трошоци на секој трговец на мало а кој ги плаќа трговецот на големо или производителот и нема да има дополнителни трошоци за рекламирање и позиционирање на производите, рече Бектеши.
Тој соопшти и дека деновиве , по најавата за намалување на рабатот некои трговски дуќани ги намалиле цените на одредени производи.
„Ако пазарниот инспекторат и другите надлежни институции забележат на други места енормно зголемување на цените, ние ќе ја прошириме листата ако треба и на дневна основа. Се соочуваме со една од најголемите кризи, нема да дозволиме некој да прави профити како порано а со покачување на цените за 60 -70 отсто врз грбот на граѓаните,треба да преовлада моралот и етиката, изјави министерот Бектеши.
Тој информира дека по донесувањето на ребалансот на буџетот мерките за граѓаните и стопанството за ублажување на ценовниот шок, а кои овој пат се потаргетирани, ќе бидат веднаш ставени во функција.
Мирјана Трпческа