„Во овој момент на дел од мерките се прави редизајн, а кога ќе бидат направени сите анализи ќе биде воведен и нов пакет мерки, најави премиерот Димитар Ковачевски денеска од Пробиштип, одговарајќи на новинарско прашање за чекорите на Владата за ублажување на бранот поскапувања а со кои би биле опфатени граѓаните но и бизнис секторот. 
Тој потсети на ребалансот кој е предложен до Собранието, и со кој веќе се предвидени нови 80 милиони евра како антикризни мерки. Ковачевски информира дека остануваат на сила мерките за поддршка на граѓаните со најниски примања како што е онаа за електричната енергија.
„Ние први, како Влада, реагиравме со мерки и тоа беше потврдено со сите извештаи на почетокот на енергетската криза. Направивме намалување на Данокот на додадена вредност на електрична енергија и извршивме субвенционирање на 80 проценти од сметките кои граѓаните ги плаќаат. Овие мерки продолжуваат до крајот на оваа година, изјави Ковачевски.
Во однос на стоковите резерви, премиерот истакна оти тие се на ниво, кое е пропишано со закон.
„Со нафтените деривати имаме непречено снабдување постојано, од почетокот на кризата. Во однос на храната се управува дневно и неделно во однос на резервите кои ги имаме и обезбедуваат непречено снабдување на пазарот во услови кога има недостатоци. Ние во моментов немаме недостатоци на храна во државата, бидејќи преку директни контакти со соседите оебзбедивме непречен проток на прехранбени производи, рече Ковачевски дополнувајќи дека корекцијата на пензиите останува да се реализира во септември.