На последната владина седница биле усвоени измените на Законот за минимална плата со кои од март годинава треба да започне тригодишното зголемување на минималната плата.
Последната синдикална минимална потрошувачка кошничка во Македонија, измерена од страна на Сојузот на синдикатите изнесува 32.215 денари, а минималмата плата од март оваа година ќе изнесува само 8.800 денари.
Согласно измените на Законот, во март годинава минималната плата ќе изнесува од сегашните 8.050 денари на 8.800 денари, во март 2015 година – 9.590 денари, а во март 2016 година ќе достигне 10.080 денари. За текстилната и кожарската индустрија ќе има период на прилагодување до 2018 година.
За синдикатите, работодавачите и Владата, значајно е тоа што зголемувањето на минималната плата е направено со заеднички договор меѓу сите социјални партнери.
– Нема причина да не веруваме дека ќе се спроведува законот, истакна вицепремиерот и министер за финансии Зоран Ставрески на денешната заедничка прес-конференција со синдикатите и работодавачите.
Тој нагласи дека зголемувањето на минималната плата се прави во време кога Македонија има најниско ниво на невработеност и кога се креирани над 100 илјади нови работни места.
– Иако имаше скептицизам дека социјалните партнери ќе утврдат минимална плата, тоа го направивме со историскиот договор во 2011 година, а денес во услови на криза успеавме да се договориме и да ја зголемиме минималната плата, рече претседателот на Сојузот на синдикати Живко Митревски.