„Две недели откако алармиравме дека пченицата нема кој да ја купи, и дека треба владата да изврши интервентен откуп на најмалку 10.000 тони пченица од индивидуалните земјоделци, Владата конечно призна дека ситуацијата со откупот е загрижувачка“, изјави пред новинарите Ленче Николовска, пратеник од Сојуз за иднината.
„Владата од една страна немилосрдно троши пари, а од друга страна кукавички, преку така наречените лидери на земјоделците, ги спротивставува производителите на пченица и мелничарите. Едните прозивајќи ги за неквалитетно производство а другите за недостаток на патриотизам зошто не ја купуваат прво домашната пченица. Ваквото однесување на Владата само ја потврдува причината зошто ни пропаѓа домашното производство на пченица и како свесно ги тераат мелничарите да работат со загуби“, истакна Николовска.
Според неа во последниве пет години 20 мелнички капацитети ставија клуч на врата токму поради штетата која им ја прават, прво со притисокот да мора да купат скапа домашна пченица, а потоа со нелојалната конкуренција со евтиното српско брашно. Долгорочното решение на проблемот е во намалувањето на производната цена на пченицата преку 50% поевтина нафта, семе и ѓубрива со што земјоделците ќе имаат цена која ќе им одговара на мелничарите а ќе биде конкурентна и на увозната. Краткорочното или најважно е сега да изврши интервентен откуп и да ја спаси годинешната реколта.