Контроверзниот бизнисмен Субрата Рој најверојатно нема лесно да го реализира проектот кај Љубаниште, Охрид, каде заедно со македонските власти најавува градење на луксузен комплекс, со оглед на спротивставените изјави кои за НОВА ги дадoa Министерството за култура и Владиката Тимотеј.
И двете страни ја спорат сопственоста на земјиштето и тврдат дека е нивно и дека тие располагаат со правата и оттука со (не)можноста да му се продаде на контроверзниот бизнисмен, кој во неговата матична земја Индија се гони за криминали и проневери и во моментов тамошниот суд пресуди враќање на долг од 4,38 милијарди долари.
Владиката Тимотеј за НОВА изјави дека “нема намера ниту да дава, ниту да подарува земјиште, ниту пак дека некој го прашал за земјиштето”, додавајќи дека “не може власта, односно Министерството за култура да дава нешто што не е нивно”. Што се однесува до Субрата Рој, Владиката Тимотеј го карактеризира со зборовите- “тој е обичен мангуп”.
Од друга страна пак, Министерството за култура за НОВА изјави дека спорното земјиште “не е црковно, туку државно” и оттука, Република Македонија се води како сопственик.
Вчера Субрата Рој пристигна во Македонија и денеска е во Љубаниште, како и на средба со вице-премиерот Ставревски.
Во јануари, домаќин на Субрата Рој беше вицепремиерот и министер за финансии Зоран Ставрески, кој тогаш истакна дека веќе е формиран координативен тим од триесетина експерти, како на надлежните институции во Македонија така и на Сахара групацијата, за да се уредат сите правни, економски, еколошки прашања за да се забрза реализацијата на проектот.
Рој во македонските медиуми деновиве беше топ-тема и заради градежната парцела со површина од 621 метри квадратни спроти споменикот „Воин на коњ“ која бесплатно ќе ја добие индискиот бизнисмен.
Одлуката за подарување на атрактивната локација во строгиот центар на Скопје ја донело Министерството за култура, а истата веќе е публикувана во Службен весник.
Префрлањето на сопственоста на земјиштето на компанијата „Сахара глобал“ ќе се реализира во рок од 60 дена, по што обележјето на Мајка Тереза ќе може да почне да се гради на постоечкиот пешачки коридор помеѓу хотелот во изградба „Мериот“ и планираниот хотел што треба да го гради грчкиот бизнисмен Деметрис Кондоминас.
Според СЕБИ (индиската Комисија за хартии од вредност), компанијата „Сахара Груп“ на Субрата Рој должи 4,38 милијарди долари, а овие пари што сега им се враќаат на инвеститорите се од уплата извршена од страна на групацијата во износ од 934 милиони долари. „Сахара“ тврди дека износ од 3,65 милијарди долари има вратено на две компании што купиле нејзини обврзници директно, но ова треба допрва да се утврди од независни извори.