По реакциите и критиките во јавноста и од невладините организации, НОВА дознава дека власта ќе ги коригира предложените измени на Законот за јавни претпријатија со кои требаше да се именуваат заменици во сите јавни претпијатија во кои досега немаше вакви функција.
Според информации на НОВА, собраниските служби проверуваат дали може да се интервенира со амандман во веќе предложените законски измени или ќе се достави нов предлог – закон.
Со новите измени на Законот за јавни претпријатија, заменици директори ќе се избираат само во јавните претпријатија што се формирани од Владата – вкупно 12 на број, а не и во јавните претпријатија кои се формирани од Град Скопје и од општините. Доколку беше изгласано вакво решение замeници директори ќе беа именувани во вкупно 129 јавни претпријатија, а трошокот на годишно ниво според проценките на невладините организации ќе изнесуваше 2 милиони евра.
Фондацијата Отворено општество – Македонија денеска побара да се повлечат измените на Законот за јавни претпријатија.
ФООМ смета дека „воведувањето нови позиции што не се неопходни, туку имаат за цел да служат за задоволување на партиските апетити, само дополнително ја еродираат довербата на јавноста во јавниот сектор. Со вакви решенија граѓаните плаќаат за нерационални трошоци, кои не го подобруваат квалитетот на јавните политики или јавните услуги“.
И други невладини организации: Институтот за демократија „Социетас Цивилис“, Центарот за управување со промени и Центарот за граѓански комуникации, исто така побараа да се повлече Законот кој е предложен да се донесе по скратена постапка.
„Во 22 од овие 129 јавни претпријатија има помалку од 10 вработени. Ако се земе во предвид дека сите овие јавни претпријатија покрај директор имаат и управен и надзорен одбор, тоа значи дека поголем е бројот на избрани и именувани лица, од бројот на вработени кои се носители на дејноста. И сега наместо да се направи рационализација, односно да се намалат бројот на функции, се воведува нова дополнителна функција. Сите овие податоци наведуваат на заклучок дека предлогот за воведување на дополнителна функција во јавните претпријатија е нерационален“ коментираат невладините организации.
Министерот за информатичко општество Дамјан Манчевски денеска кажа дека намерата била да се подобри работата на одредени јавни претпијатија, а не да се вдомуваат партиски кадри.
„ Голем дел од овие јавни претпријатија навистина имаат сериозни проблеми во своето работење и треба максимално да ангажираме кадар за да се подобри функционирањето. МИОА е во фаза на изготвување на хоризонтална функционална анализа и изготвување на нов закон за висока рабоводна служба со кои сите овие различности во институциите ќе се унифицираат и ќе се заведе ред. Таа анализа ќе покаже дали ова е добар предлог или не“ рече Манчевски.
Една од целите на законот, како што рече Манчевски, е со изборот на заменици-директори, да се избришат и помошниците директори.
Измените на Законот за јавни претпријатија се на дневен ред на денешната собраниска седница.