Претседателот на ВМРО-ДПМНЕ, Никола Груевски денеска не се сретна со германскиот специјален пратеник, иако во агендата на Јоханес Хајндл, била предвидена таква средба. Од владејачката партија за НОВА велат дека причината е тоа што Груевски се уште е на приватно патување во странство заедно со семејството.
-Претседателот на ВМРО-ДПМНЕ не беше присутен на денешната средба од причини кои веќе ги соопштивме. Заедно со семејството е на приватно патување. Тој беше лично поканет на свадба кај пријател надвор од Македонија уште пред неколку месеци. Престојот во странство го завршува заклучно со утрешниот ден, вели за НОВА портпаролот на владејачката партија Иво Котевски.
Како што дознава НОВА од дипломатски извори, германскиот пратеник воопшто не бил известен за отсуството на Груевски, иако тој специјално денеска пристигна во Македонија да оствари поединечни средби со лидерите на најголемите четири политички партии – потписници на Пржинскиот договор.
Котевски за време на средбата на Хајндл со партиски претставници на ДПМНЕ, телефонски за НОВА изјави дека не знае точно кој од партијата ќе се сретне со Хајндл.
Според соопштението на ВМРО-ДПМНЕ испратено до медиумите, денеска со Хајндл се сретнал со делегација на партијата, не прецизирајќи имиња кој бил на средбата.
„На средбата се разговараше за актуелната политичка состојба, позициите и ставовите на ВМРО-ДПМНЕ поврзани со постигнување на решенија од областите опфатени со политичкиот договорот постигнат минатата година, како и европските интеграции како дел од стратешките приоритети на државата“, се вели во соопштението.
Портпаролот на СДСМ, Петре Шилегов пред неколку дена објави фотографии од Груевски на аеродромот во Рим и го обвини дека бил во шопинг на скапи брендови. Од ВМРО-ДПМНЕ реагираа на обвинувањата и соопштија дека Груевски бил кај пријател на свадба во Италија.
