Лидерот на ВМРО-ДПМНЕ Христијан Мицкоски вечерва изјави дека тој останува на чело на партијата, откако Централниот комитет на партијата го одбил неговиот предлог за одржување вонреден когрес на кој тој не би бил кандидат, а во следните шест месеци, не може да се поднесе ново барање за конгрес.
”Иако до денешен ден немаше иницијатива за вонреден конгрес од оние кои водат хајка против мене, а целта им е ВМРО-ДПМНЕ и му служат на Заев, јас на сопствено барање поднесов предлог за свикување на вонреден конгрес на кој јас нема да се кандидирам. ЦК, откако ја напуштив седницата, го одби едногласно ова барање и не се согласи со ваквиот предлог и ми даде полн легитимитет да продолжам да раководам со ВМРО-ДПМНЕ“, изјави Мицкоски.
Избрани се и нови членови на Извршниот комитет на партијата, додека генералниот секретар Игор Јанушев си поднел оставка на оваа партиска функција од лични причини.
Од иницијативниот одбор за свикување на вонреден конгрес за нов претседател на ВМРО-ДПМНЕ, се огласија по повод изјавата на Христијан Мицкоски после Централниот комитет на партијата. Тие го нарекоа лидерот на ВМРО-ДПМНЕ лош глумец.
„Христијан Мицкоски е само лош глумец чија суета ја турка ВМРО-ДПМНЕ во пропаст.
Да беше искрен во предлогот за вонреден Kонгрес и намерата да не се кандидира, ќе ја искористеше можноста што ја дава статутот, ќе си дадеше оставка и ќе беше свикан конгресот, наместо да прави театар злоупотребувајќи го Централниот комитет, кој е со истечен мандат.
Се уште актуелниот Претседател на ВМРО-ДПМНЕ нема ниту кредибилитет, ниту легитимитет да именува или разрешува партиски органи.
Единствено чесно од негова страна би било извинување до членството за претрпените порази, преземање на одговорност, оставка и закажување на вонреден Конгрес.
Само така ќе си го одржи зборот и ќе го сочува образот“, соопштија вечерва од иницијативниот одбор за вонреден конгрес на ВМРО-ДПМНЕ.