Поранешниот градоначалник на Старо Нагоричане Миодраг Јовановиќ, инаку од Демократската партија на Србите во Македонија (ДПСМ) кој минатата година прегази човек и го напушти местото на несреќата, во понеделникот бил именуван за директор на поштата во Куманово.
Оваа информација ја даде портпаролот на СДСМ, Петар Шилегов и обвини дека Јовановиќ наместо да одговара за тоа што усмртил човек, власта го унапредува и го наградува за послушноста и лојалноста кон партијата:
-Станува збор за Миодраг Јовановиќ, поранешен градоначалник на Старо Нагоричане, кој на македонската јавност и стана познат во април минатата година. Тогаш тој со службен автомобил го прегази триесетгодишниот Срѓан Лазаревиќ и побегна од местото на настанот без да му укаже помош. Неколку дена подоцна прегазениот им подлегна на повредите, а во јавноста остана да виси прашањето дали ако останел на местото на несреќата и повикал помош, Лазаревиќ ќе преживеел.
ВМРО-ДПМНЕ се согласи со критиките на СДСМ и денеска најави дека ќе покренат иницијатива за негова смена од кумановската Пошта:
ВМРО-ДПМНЕ во рамките на законските и институционални можности ќе покрене иницијатива за негова смена од раководна позиција. Иако станува збор за позиција која ја извршувал пред да стане градоначалник, лицето Миодраг Јовановиќ во овој момент, според сите етички норми, не треба да ја извршува истата функција, пишува во партиското соопштение.
Претседателот на ДПСМ Иван Стоиљковиќ, од чии партиски редови доаѓа поранешниот градоначалник, вчера се обиде да го објасни именувањето на Јовановиќ, но на доста нејасен начин- прво рече дека поранешниот градоначалник се уште не е именуван на оваа позиција, но призна дека постапката е во тек.
Потоа објасни дека не треба да биде спорно именувањето на Јовановиќ за в.д. раководител на Поштата – Куманово, бидејќи тој и пред да стане градоначалник бил на ова работно место, за на крајот да каже дека веќе се бара ново кадровско решение за раководната позиција во Поштата – Куманово.