ВМРО ДПМНЕ денеска преку соопштение објави предлог со решенија за кризата, што го нарекуваат патоказ.
– Патоказот кој го понуди ВМРО-ДПМНЕ е добра основа за постигнување консензус околу излез од кризата. Убедени сме дека со чесен пристап, откако ќе одговориме на отворените дилеми, ќе го имаме и одговорот во која насока треба да го бараме излезот од сегашната ситуација, се вели во соопштението.
Во него се содржани пет точки, од кои првата е да се усогласи, „дали важноста на политичката праксата за коалицирање на победник со победник е фактор на дополнителна стабилност во државата дали како таква треба опстои или се отфрла сега и во иднина“.
– Ова е неопходен предуслов со цел одбегнеме двојни стандарди во домашната политика и менување на политичките традиции, обичаи зависно од изборните резултати. На долг рок усогласувањето околу овој принцип и неговото важење или отфрлање ќе донесе поголема предвидливост на политичката сцена, велат од ВМРО ДПМНЕ.
Втората точка е да се усогласи, како што велат „дали се прифатливи странските агенди во внатрешно-политички цели или пак единствено тие кои што се претставени и верификувани од граѓаните на Република Македонија на избори се актуелни, релевантни и продуктивни агенди за државата?“
Во третата точка, ВМРО ДПМНЕ бара да се постигне согласност за тоа на која политичка коалиција или партија би и припаднало местото Претседател на Парламент, односно дали на онаа која победила на изборите или треба да биде предмет на надгласување.
Во четвртата точка, од ВМРО ДПМНЕ бараат партиите да се изјаснат дали се за задржувањето на мултикултурниот модел македонското општество со подеднаква промоција на сите заедници или се поддржува промена на овој моделот во двонационален.
Во последната, петта точка, ВМРО ДПМНЕ бара изјаснување дали врвен приоритет во овој момент останува стабилизирањето на земјата, институциите, економијата и европските реформи за евроинтеграции или како што велат тоа же се замени со „редефинирање на односите помеѓу заедниците и државното устројство на Република Македонија“.
Овој документ претседателот на ВМРО ДПМНЕ Никола Груевски го најави во интервју за Канал 5. Од СДСМ тогаш одговорија дека ВМРО ДПМНЕ не може да биде дел од решението, бидејќи се виновници за кризата.