ВМРО- Народна партија по повод наградата на академикот Матеја Матевски, златен медал за заслуги од претседателката на Косово, Атифете Јахјага, прашува: „Зошто има потреба еден познат интелектуалец 50 години во комунизмот и уште 23 години во демократија да го крие своето национално чувство и припадност?
ВМРО-Народна партија не може а да не го сподели сознанието дека академик Матеја Матевски бил практично Албанец од Македонија.
„Ваквиот чин на признание на академикот Матеја Матевски кој после 80 години мимикрија и криење, лично се одважи и храбро го сподели со целата македонска јавност е за поздравување и ние му честитаме. Тоа е основно човеково право на секој поединец, националните чувства слободно да ги декларира. Но, ова лично признание ја шокира македонската јавност, затоа што всушност претставува напуштање на античкиот македонизам промовиран од актуелната власт во Република Македонија“, пишува во соопштението на ВМРО-НП.
Оттаму велат дека со ова се отвора прашањето принципиелно и суштински во каква заблуда сме живееле и се уште живееме.
„Зошто има потреба еден познат интелектуалец 50 години во комунизмот и уште 23 години во демократија да го крие своето национално чувство и припадност? Овој доблесен чин само конечно ни потврдува дека нешто не е во ред со македонското општество, и дека сериозно треба да го преиспитаме таканаречениот македонизам, и да ги прифатиме и примениме принципите на демократијата кон која се стремиме“, се додава во соопштението од ВМРО-НП.