Хрватска ја тресе афера со фирми преку кои се переле пари во Чешка. Полицијата утврдила дека преку Фирмата „Реморкер Интернационал“ која пред осум години била регистрирана во Прага се переле пари од Хрватската стопанска комора, како и многу други уплати на пари објави весникот Нови Лист.
Преку сметката на оваа фирма поминале повеќе од 70 милиони куни од различни маркетиншки агенции. Истрагата на Бирото за организиран криминал и корупција во „Хрватски автопатишта“ исто така се води поради уплатите на ХГК, на сметка на „Реморкер Интернационал“.
Откриени се и други фирми со еден вработен преку кои оделе трансакциите во Чешка, а вкупниот број е повеќе од 80 такви фирми. Еден од основачите на „Реморкер Интернационал“ признал во полицијата како биле извлекувани парите. Хрватската полиција во четвртокот ги уапси и соработниците на претседателот на Стопанската комора поради сомнаеж дека од таму извлекле околу 32 милиони куни.