Нема нов сомнителен случај со симптоми слични како починатиот Британец, за кој постои сомнеж дека бил заболен од ебола. Неговиот пријател кој се наоѓа во карантин нема никакви симптоми на болест. Телото на починатиот е однесено на Институтот за патологија, од него се земени примероци за анализа кои утринава се испратени во референтна лабораторија во Хамбург. Резулатите се очекува да бидат готови во сабота попладне. Врз починатиот нема да биде извршена обдукција се додека не пристигнат резултатите, а телото е сместено во стаклен и дрвен сандак, со средства за дезинфекција и е ставено во изолирана просторија на Клиниката за инфективни болести.
– Здравствениот систем е во состојба на подготвеност и случајот се третира како да е ебола, иако официјално не е потврдено дека станува збор за ова опасна болест. Кога ќе ги добиеме резулатите и доколку не се работи за ебола, врз телото ќе биде извршена обдукција за да се види од што починал, изјави Јованка Костовска од Министерството за здравство.
Во хотелот „Супер 8 “ каде што престојувал починатиот 25 луѓе се наоѓаат под карантин, таму постојано има медицинска екипа од доктор и медицинска сестра и се разговара со луѓето, се следи нивната здравствена состојба. На Клиниката за инфекитивни болести 10 луѓе се наоѓаат во карантин, меѓу нив и медицинската екипа од Итната медицинска помош.
Почнатиот Британец немал крварење од сите делови на телото,како кај еболата, туку внатрешно, што отвара сомнеж дека се работи за нешто друго велат надлежните. Тој три дена по ред не излегувал од хотелската соба, таму влегувала само собарката за да го пресоблече и да му помогне.
Од Министерството за здравство не одговорија дали Институтот за патологија има можности и опрема да ја направи обдукцијата на телото. Не се соопштува ниту идентитетот на починатиот Британец.
Во јавноста се шпекулира дека се работи за бизнисменот Колин Џефри, кој пред неколку години бил прв човек на Советот за странски инвеститори во Македонија, поранешен директор за стратегиски планирања во „Џонсон Мети“. Неговиот пријател кој во моментот се наоѓа под карантин, е Мајкл Инглиш бил советник во македонската Влада. Нема официјална потврда за овие информации.
Клиниката за инфективни болести каде беше хоспитализиран пациентот, е дезинфицирана и функционира нормално, а делот каде престојувал пациентот е под посебен режим и таму се веќе преземени сите мерки за темелно чистење и дезинфекција на просторот.