Летово за време на одморите дел од инсулинските аптеки ќе работа само во одредени денови во неделата, а пацинетите ќе мора со автобус по горештините да го носат инсулинот со што ризикуваат да се расипе или да не делува
Дел од инсулинските аптеки во Скопје ќе работат само во одредени денови во неделата поради што пациентите мора да патуваат во друга населба за да земат инсулин, реагираат дијабетичари во НОВА.
Инсулинската аптека во скопската населба Драчево ќе дели инсулин само во еден ден од неделата. Оваа аптека опслужува околу 3000 пациенти од оваа и од соседните населени места кои сега ќе мора да одат во поликлиниката Јане Сандански во населбата Аеродром за да земат инсулин.
Аптеките во населбите Чаир и Ѓорче Петров, пак нема да работат по еден ден во неделата. Тоа за дијабетичарите е проблем бидејќи голем дел од старите луѓе не можат да се движат, а постои опасност инсулинот да изгуби во квалитет ако се носи по горештините.
„ Има стари луѓе кои не можат да се движат, како тие по жештините ќе патуваат до таму. Како ќе го носат инсулинот по жешкото кога не смее да се прекине ладниот ланец бидејќи со тоа лекот го губи дејството или може да се расипе“ велат пациенти со дијабетес кои се јавија во НОВА.
Информацијата за НОВА ја потврди директорот на Здравствен дом- Скопје, Злате Мехмедовиќ. Тој тврди дека имаат дефицит од фармацевти поради што се принудени во текот на летните одмори да функционираат на тој начин.
„Поради недостиг на кадар некои пунктови ќе работат само во одредени денови, додека во поликлиниките Јане Сандански, Букурешт и Бит Пазар ќе работат секој ден, односно пет дена во неделата. За да можат инсулинските аптеки да функционираат нормално потребни се уште двајца фармацевти и двајца фармацевтски техничари. Ние уште во март упативме барање во Министерството за здравство не само за ова, туку за вработување на 100 луѓе од разни профили што преставува еден минимум за да можеме да функционираме. Но, одговор се уште нема“, изјави за НОВА, Мехмедовиќ.
Според Мехмедовиќ има недостиг на кадар во Итната медицинска помош, во Домашна посета, во Комисиите за боледување, кај екипите за вакцинација и во други сегменти.
Од Здружението за детски дијабетес „Баланс МК“ велат дека реагирале до здравствениот дом од каде што им потврдиле дека новонастанатата ситуација е поради недостиг на кадар.
„Не смее да се остави ниту еден пациент без инсулин. Ова особено е критично за старите лица кои не можат да се движат и нема никаква логика од Драчево да одат во населбата Аеродром по инсулин. Тие луѓе не можат да се движат по горештини и да го носат инсулинот во автобус на високи температури“, вели Наташа Деспотовска Димитриевска претседател на Здружението за детски дијабетес „Бланс МК“.
Во Скопје и околните села има вкупно шест инсулински аптеки. Половина од нив во текот на летото ќе работат со намален капацитет.
НОВА се обрати во Министерството за здравство со прашање до каде се новите вработувања и како да се реши недостигот со кадар инсулинските аптеки, но одговор до објавување на текстот не добивме.