Властите на Косово јавија дека човечки остатоци на повеќе стотици Албанци, убиени за време на конфликтот од 1998-99 година во Косово, биле најдени во Србија во близина на границата со Косово, пишува британскиот дневник “Гардијан”.
Косовските власти бараат од Србија да продолжи да бара тела на својата територија бидејќи можеби тие луѓе биле однесени во Србија во обид да се скријат убиствата на Албанците за време на војната. Според Пренк Гјетај, кој ја води Комисијата за исчезнати лица, информаторите рекле дека може да има 250 па дури и 400 тела.
Се верува дека за време на војната 10.000 лица биле убиени од страна на српската полиција. Најголемиот дел од жртвите се Албанци а 1.700 лица се уште се водат како исчезнати.
Најновото откритие е заеднички потфат на Косово, Србија и Еулекс, полициската и судска мисија на ЕУ на Косово. Функционерите на двете земји се очекува наскоро да дискутираат како да се продолжи со откопувањето на телата. Овие тела биле пронајдени откако една дигалка кренала бетонска плоча на еден пат во јужна Србија, на граница со Косово.
Досега, од 2000 година, се откриени шест масовни гробници а најголемата содржела 800 тела на косовски Албанци.