Истекува ултиматиомот на армијата на Египет упатено до исламистичкиот претседател Мохамед Морси да најде политичко решение за кризата. Во меѓувреме продолжуваат протестите на неговите противници кои бараат тој да замине од функцијата, јавува Гласот на Америка.
Во изјавата објавена непосредно пред рокот, Морси предложи влада на концензус меѓу партиите и формирање независна комисија што ќе изготви уставни амандмани како начин за излез од кризата. Тој сепак повтори дека нема намера да поднесе оставка, предупредувајќи дека изборниот легитимитет е единствената гаранција против нестабилноста.
Во меѓувреме, армијата е распоредена на клучните точки во Египет. Војската ја зазеде зградата на државната телевизија од каде се отстранети сите вработени освен неопходните за продуцирање вести.
На плоштадот Тахрир се собрани стотици илјади граѓани кои бараат повлекување на Морси и органзирање на предвремени избори. Истовремено во близина се наоѓаат и бројни приврзаници на претседателот. Во досегашните судири меѓу двете спротиставени групи загинаа 47 луѓе, а илјадници се повредени.
Виш соработник на Морси подоцна до Египќаните порача мирно да му се спротистават на, како што го нарече „воениот удар“ што во моментов е во тек.
Армијата на претседателот Морси му даде рок од 48 часа да го надмине политичкиот ќорсокак или да ризикува воена интервенција. Рокот до кога се очекува да се надминат разликите меѓу исламистичката влада и нејзините критичари истекува во пет часот по локално време.
Претходно Морси се појави на националната телевизија и ги потсети граѓаните дека бил демократски избран на функцијата пред повеќе од една година.
Додека зборуваше, илјадници Египќани продолжија со демонстрациите во Каиро, едни поддржувајќи го, а други барајќи негова оставка.