Западот ја зголемува пресијата врз Москва откако вчера Владимир Путин доби зелено светло од Советот на руската федерација за воена интервенција во Украина.
Северно-атлантската алијанса одлучи да свика вондреден состанок денес на своите 28 амбасадори членки на НАТО а потоа ќе се одржи и состанокт на Комисијата НАТО-Украина, изјави генералниот секретар на НАТО Андерс Фог Расмусен.
“Свикав состанок на Северно-атлантскиот совет поради воената акција на Русија во Украина. И затоа што претседателот Путин и се заканува на оваа суверена нација”, рече тој. И додаде дека Русија ги нарушува принципите на Обединетите Нации и со тоа им се заканува на мирот и безбедноста на Европа. “Русија мора да ги сопре воените активности и своите закани”, рече Расмусен.
На состанокот со Украина НАТО ќе ја поддржи сувереноста и територијалниот интегритет на Украина која, вели Расмусен, “има право да ја определува својата иднина без надворешно мешање”. Според НАТО ситуацијата е опасна.
Истовремено шефот на грчката дипломатија кој претседава со ЕУ денес оди за Киев заедно со својот британски колега Вилијам Хејг.
Уште вчера САД побараа од Русија да ги повлече силите испратени во Крим. Во спротивно Русија ќе биде изложена на меѓународна изолација и сето тоа ќе има “длабоко влијание” врз односите со Вашингтон.
Како и САД, европските земји како Франција, Полска и Велика Британија испратија остар тон кон Москва.
Во саботата Украина ги стави своите воени сили во состојба на подготвеност откако Советот на руската федерација изгласа испраќање на војска во Украина “се додека се нормализира политичката ситуација во земјата”. Според Русија оваа земја си зема за право “да ги штити своите интереси и русофонското население во земјата”.