Вооружени мажи денеска упаднаа во либискиот Парламент и го запалија, изјави либиски пратеник.
Пратеникот Омар Бушах за странските медиуми изјави дека вооружени мажи влегле во Генералниот национален конгрес (парламентот) и ја запалиле зградата.
Според очевидци над зградата од Парламентот се издига црн чад, а на километри се слушаат истрели.
Либиската држацвна новинска агенција ЛАНА јави дека непозната вооружена група ги затворила улиците кои водат кон Парламентот.
Во неколку делови на главниот град на Либија, Триполи се слушаат истрели.
Претходно, нерегуларните сили на самопрогласената Либиска национална армија на поранешниот генерал Халифа Хафтар ја презеде одговорноста за нападот врз Парламентот во Триполи.
Хафтар тврди дека централната Влада и Парламентот немаат мандат и најави продолжување на операцијата и покрај тоа што либиските власти ја оценија како државен удар.
– Нападот го изведоа претставници на Либиската национална армија, изјави портпаролот на групата Мохамед ал Хеџази.
Тој наведе дека Парламентот е виновен за кризата во Либија и го обвини Генералниот национален конгрес дека ги поддржува екстремистичките организации.