Клиничкиот центар е полн со вооружени полицајци. На самиот влез на Клинички обезбедувањето и полицијата, не дозволуваат влез на приватни возила, или доколку некое се пропушти, детално се прегледува. Се пропуштаат само возилата на Итната медицинска помош и од МВР.
Наоружани полицајци ги чуваат и двата влеза на Хируршките клиники. На новинарските екипи не им е дозволен пристап.
Роднините на повредени се внатре, но нема информации колкав е бројот на повредени или загинати. Очевидци, вработени во клиниките велат дека голем број на повредени се донесени во скопските клиники денеска.
И во Клиничкиот центар и во болницата „8 Септември“ каде што исто така има донесено повредени, рекоа дека имаат наредба да не даваат никакви информации за медиумите. Во Институтот за судска медицина најавија дека наскоро ќе има соопштение за јавноста.
Информација за тоа одби да даде и портпаролот на МВР Иво Котевски кој соопшти само дека рано утринава извршен е терористички напад во населбата „Диво насеље“ во Куманово.