Време е да се утврди конечно одговорноста во тортурите што ги водела ЦИА, во кои беше вмешана и Македонија преку случајот Ел Масри. Според комесарот за човекови права на Советот на Европа Нилс Мужниекс, владите одбиваат да ја утврдат вистината и да признаат дека биле соучесници во илегалната програма на ЦИА и спроведена со европските земји помеѓу 2002 и 2006 година. Во оваа програма биле киднапирани и држени во затвор лица кои биле осомничени за тероризам а некои од нив и измачувани. Оваа програма Советот на Европа ја опишува како “не само политичка грешка туку како тешко нарушување на човековите права”.
На 13 декември 2012 година Судот за човекови права во Стразбург ја објави пресудата “Ел Масри против екс југословенската Република Македонија”. Оваа пресуда беше прва во која беше подвлечена одговорноста на една земја за учество во програмата на ЦИА. Но Судот смета дека Македонија е одговорна за тортурата која ја вршела екипа на ЦИА со присуство на македонски агенти како и за нехуманиот третман за време на притворот на Ел Масри. Судот заклучи дека Македонија не ја исполнила обврската да спроведе истрага.
Се очекува Судот да ја испита наскоро илегалноста на програмата на ЦИА спроведена во Полска, Романија и Литванија.
Последниот извештај на Отворено општество за правда потсетува дека 25 европски земји соработувале со американската ЦИА. Од сите овие земји само во Италија биле донесени пресуди за лица кои учествувале во програмата на ЦИА. Беа осудени 23 државјани на САД за киднапирање во 2003 на еден оџа.
Според Советот на Европа мораат итно да се донесат политички и судски иницијативи за да се утврди одговорноста. Но земјите учесници во програмите на ЦИА треба да сметаат на поддршката на ЕУ која мора да ја стави целата своја политичка тежина за да ги натера земјите на одговорност.