Српскиот претседател Александар Вучиќ изјави денеска дека Србија никогаш не користела никакви трикови и дека ќе го спроведе она што го кажала дека ќе го направи.
„Тоа е мојата порака до оние кои зборуваа за тоа. За разлика од сите нив, ние никогаш не користиме трикови, ќе го имплементираме тоа што го кажавме. Она што го кажав во Народното собрание на Република Србија, тоа што го кажав во Охрид, во Брисел и на петорката во Белград, го повторувам секој ден, а мојот став не се смени ни за педа пред никого“, рече Вучиќ на прес-конференцијата со италијанскиот министер за надворешни работи Антонио Тајани по повод Форумот за деловна и научна соработка меѓу Србија и Италија.
Одговарајќи на новинарски прашања дали Белград ќе го спроведе договореното на средбата во Орхрид за нормализација на односите меѓу Белград и Приштина, претседателот рече она на што ќе стави потпис или усмено и вербално се согласи, е правно обврзувачко за Србија.
„Никој друг не може да произведе правни последици за Република Србија освен нејзиниот претседател, а во некои случаи и премиерот или министерот за надворешни работи“, истакна Вучиќ.
Тој додаде дека Србија ќе работи на спроведување на сето она што, како што кажа, „рекла дека ќе направи“.
„Не мислам дека Приштина ќе ја исполни својата единствена обврска, а тоа е во согласност со договорот постигнат во дијалогот, да формира Заедница на српските општини. Значи, сè што кажавме дека ќе работиме, ќе го направиме. Она што реков дека нема да го правиме му го повторив и денеска на Антонио Тајани, за да нема коруптивни и лажни толкувања и да видите дека воопшто не се плашам да го кажам истото во лице на сите. Би замолил и некои министри од некои земји да ги прашаат канцеларот (на Германија) Олаф Шолц и претседателот (на Франција) Емануел) Макрон, дали сум им го кажал тоа во лице или не“, рече Вучиќ.
Тој повтори дека за Србија тоа значи дека не станува збор за членство на Косово во Обединетите нации, како и во организации, институции и агенции на ОН и дека ќе нема никакво признавање.