Во Дубровник, Хрватска, на 9 -ти август се одржа Третиот меѓународен саем на грамофонски плочи насловен Dubrovnik Vinyl Fair, чиј организатор е Здружението на љубители на грамофонски плочи Дубровник 33/45.
Штандовите беа поставени на полустровот Лапад, попрецизно, во Увала Лапад, недалеку од плажите на најатрактивниот туристички центар во Хрватска – Дубровник.
Според организаторите, годинава саемот бил со најбогата понуда и рекорден број на учесници и посетители. Присутни биле излагачи од Подгорица, Сараево, Загреб, Белград, Ниш и за прв пат – и од Скопје.
-Освен винили, во Увала Лапад, можеше да се сретнат и други физички носачи на звук. Имаше и аудио опрема, книги, стрипови, разни предмети од колекционери на користени плочи, од уметници, креативци… За време на саемот имаше винил слушалница организирана од здружението Дубровник 33/45, ди џеи, музика насекаде. Приликава ја искористив да ги претставам моите книги и плочи, рече Тошо Филиповски.
Тој, на Dubrovnik Vinyl Fair беше единствен претставник од Македонија. Филиповски е пасиониран вљубеник во грамофонски плочи, еден од најголемите кај нас, со богата колекција од винили. Во 2021 година стана добитник на највисоката државна награда „Мито Хаџивасилев Јасмин“ за остварување во областа на публицистиката. Зад него стојат неколку книги за македонската рок сцена.