Претседателите на ФИФА и УЕФА, Сеп Блатер и Мишел Платини добија забрана од осум години за била каква работа поврзана со фудбалот.
На сослушувањето на Етичката комисија во Цирих, ниту Блатер ниту Платини не се појавија.
Нивните забрани следат по обвиненијата за исплата на 2 милиони швајцарски франци од Блатер до Платини во 2011 година.
ФИФА денеска објави објаснување од 40 страници за истрагата а во неа се вели:
„Етичката комисија на чело со Ханс-Јоаким Екерт им забранува на Сеп Блатер, претседателот на ФИФА, и на Мишел Платини, претседател на УЕФА да работат во сферата на фудбалот осум години, како на национално така и на меѓународно ниво. Забраните веднаш стапуваат во сила“, се вели во објаснувањето.
Истрагата покажала дека Блатер во 2011 година одобрил исплата од 2 милиони швајцарски франци за договор потпишан на нелегална основа на 25.август 1999 година.
Освен забраните, Блатер е казнет и со 33.000 фунти, додека Платини со 53.000 фунти парична казна.
Со ова, Мишел Платини не може да се кандидира на претстојните избори за претседател на ФИФА. Тој ќе мора да поднесе оставка и од лидерската функција на УЕФА.
Блатер пак, веќе одамна најави дека нема да се кандидира за нов мандат во ФИФА, откако ФБИ и швајцарските власти отворија истрага за наводна корупција помеѓу членовите на ФИФА за наплата при одлучувањето за светските првенства во фудбал во Русија и Катар.