Министерството за животна средина испратило допис до Министерството за образование и наука да не се организираат екскурзии на Пеленица, Драчево, местото за кое има сомневање дека се наоѓа необележана депонија со канцерогениот линдан кој потекнува од фабриката ОХИС.
МОН им наложи на општините да не се одржуваат училишни екскурзии на локацијата, потврди Петар Атанасов од Министерството за образование за Телма. „Не смее децата да се во близина на нешто што може да им наштети. Дадени се инструкции да се избегнува Пеленица и да внимаваат каде организираат излети“ рече Атанасов.
Министерството за животна средина до крајот на годината ќе го огради просторот во Драчево за кој постојат сомневања дека се наоѓа дивата депонија со токсичен линдан.
Линданот од Меѓународната асоцијација за истражување на канцер е класифициран во група 1 канцерогени супстанци.
Изложеноста на линдан може да се појави од консумирање на контаминирана храна или преку дишење на воздух загаден со линдан. Хроничната (долготрајна) изложеност на линдан со вдишување кај луѓето се поврзува со заболувања на црниот дроб, крвта како и нарушувања на нервниот, кардиоваскуларниот, имунолошкиот и репродуктивниот систем.
Градоначалникот на Кисела Вода Филип Темелковски во интервју за Мета рече дека во целосната документација за ОХИС нема никаква информација дека таму постои складиран линдан во било каков облик и форма. „Целиот проблем е што поради начинот на кој што беше затворен ОХИС, голем дел од документацијата ја нема, некој во брзање не гледал што зема. Тука се изгубени и дел од документите кои што ја третирале депонијата. Според информациите на вработените, таму сигурно има депонија само треба да се испита што е ставено. За разлика од ОХИС, на оваа локација нема направено базени и бурињата се ставани директно во земја со тоа што, како што бев информиран, процесот на распаѓање на бурињата е многу побрз отколку во тие во базените во ОХИС“ кажа Темелковски за Мета.
Поголем дел од скопските училишта секоја година редовно организираа еднодневни екскурзии токму на Пеленица.