Советот за етика во медиумите на Македонија (СЕММ) го осуди вчерашниот физички напад врз новинарот на телевизија 24, Христијан Баневски.
„Трендот на насилство и попречување на работата на новинарите и медиумските работници продолжува да биде сериозен проблем. Со тоа се потврдуваат тенденциозните обиди да се загрози слободата на медиумите и правото на јавноста да биде информирана.
Државата е одговорна за преземање на сите активни мерки за создавање и одржување поволна средина за слободата на изразување, а таквата обврска е и во согласност со член 10 од Европската конвенција за човекови права. Комитетот на министри на Советот на Европа, исто така, препорачува да се заштити новинарството и безбедноста на новинарите и другите медиумски актери“,се вели во соопштението од СЕММ.
Физички и вербални напади кон дел од новинарските екипи имало на синоќешниот протест. Покрај новинарот на телевизија 24 кој бил удрен со јарбол од знаме од подржувач на иницијативата „За заедничка Македонија“, со навреди и пцости вчера се соочила и екипата на Телма додека анкетирала учесници на протестот.
На еден од протестите физички беше нападната и екипата ан А1 ОН, по што снимателот и новинарот завршија во Ургентниот центар. Организаторите на протестот се оградија од инцидентите бидејќи како што рекоа, не можеле да контролираат толкава маса народ.
Во ниту една друга држава не постои толку јасно организиран бран насилство против новинарите како во Македонија, констатираат новинарските здруженија од регионот. Тие потенцираат дека ситуацијата е лоша и кај нив, но убедливо е најлоша во Македонија.