Сите дивоградби кои имаат решенија за уривање ќе бидат урнати, вклучително и тие на актуелни функционери и член на градскиот совет на Охрид со кој се поврзуваат два спорни објекти, едниот во близина ја крајбрежјето, а другиот во центарот на градот, најави премиерот Заев.
„ Законот мора да важи еднакво за сите. Ако не постапи општината, ќе постапи државата. Ако не го почитува решението следува кривична одговорност“ рече Заев.
Според Регистарот на дивоградби кој на барање на УНЕСКО го изработи општината, во Охрид има 1.076 дивоградби, од кои над 400 се во заштитените зони, односно на крајбрежјето на Охридското Езеро, во потегот на Националниот парк „Галичица” и во стариот дел на градот.
Во рамки на оваа вкупна бројка, 82 предмети се однесуваат на урбана опрема, 16 се за времени објекти, 8 за плажи, 80 за куќи, апартмани и сместувачки капацитети, а останатите предмети се за помали интервенции и градежни зафати на објекти.
Во оваа електронска база на податоци внесени се вкупно 1.076 предмети за кои, во периодот од 2006 година до мај 2019 година, инспекциските служби имаат констатирано прекршувања на Законот за градење и имаат донесено некаков акт со кој се утврдува нелегална градба.