Новиот лидер на СДСМ Зоран Заев, за интервју за Радио Слободна Европа изјавува дека партијата ќе и даде бланко поддршка на власта за да го реши прашањето за името, став кој е идентичен како и на неговиот претходник, Црвенковски:
-Ако притоа го зачува нашиот национален идентитет, јазик, национална посебност итн.
Сепак, тој ја повикува ВМРО-ДПМНЕ да ја информира опозицијата, за да биде даден позитивен придонес за решението за името:
-Она што го очекувам во овие моменти заради моментумот е прво да бидеме информирани. Тоа што се случува во поново време, ние од СДСМ не знаеме скоро ништо.
Знаеме тоа што ќе излезе како информација преку вас медиумите и тоа не е коректен однос кон нас ако сакаат, пред сè власта, а после тоа и меѓународната заедница, да дадеме позитивна контрибуција кон решавањето на овој горлив проблем.
Што се однесува до враќањето на екс-премиерот во СДСМ Владо Бучковски, Заев вели дека не очекува таков потег од него, затоа што тој веќе најави формирање на свое движење:
-За соработки никогаш не ја затворам вратата. Првите моменти на најава од Владо Бучковски беа тие коишто вие ги спомнувате, но веќе поминавме неколку чекори од тогаш.
Ова движење е веќе објавено, обелоденето, со луѓе коишто ќе учествуваат во организацијата на движењето, дури веќе е најавено и прераснување во партија, така што самите тие ја пуштија пораката дека нема да се враќа во СДСМ кога веќе беше прилично јасно дека Заев ќе биде претседател. Така што, апсолутно тие ги затворија вратите и јас останувам на ставот дека не очекувам враќање на Владо Бучковски во СДСМ, вели Заев во интервјуто за Радио Слободна Европа.