За нов генерален секретар на СДСМ се најавува Оливер Спасовски, пратеник од Куманово и шеф на изборниот штаб на Зоран Дамјановски-Циц на локалните избори. Овој избор беше направен пред одржувањето на вчерашните избори за лидер на СДСМ.
Што се однесува до потпретседателите, како опција се размислува за неколку имиња: Софија Куновска, Јани Макрадули и Гордан Георгиев, иако за Куновска постои и друга опција, да застане на чело на градската организација на СДСМ, како наследничка на фотељата на Стевче Јакимовски, актуелниот градоначалник на Карпош, изјавуваат за НОВА извори блиски до врвот на партијата. Освен тоа, се најавува можноста Заев да одбере човек кој е дел од неговиот тим во Струмица. Сепак, одлуката не е донесена, со оглед на тоа што преговорите се уште течат со можниот избор за потпретседатели на партијата.
Што се однесува до новиот Извршен одбор, Заев денеска излезе со став дека по консултациите со членовите на Централниот и Надзорниот одбор, најдоцна до 30 јуни ќе биде познат составот на Извршниот одбор, како и потпретседателите, генералниот секретар, организациони секретари, односно најважните позиции во СДСМ.
За одлуката на неговиот противкандидат Зоран Јовановски повеќе да не биде активен во партијата, Заев изјави дека е среќен што тој оставил одлична можност за соработка во иднина.