Премиерот Зоран Заев денеска на почетокот на владината кампања „Силна економија, шанса за сите“ во Велес изјави дека во рамките премиерски мандат ќе го исполни ветувањето, просечната плата во Македонија да биде 500 евра.
– Ја зголемивме минималната плата, а таа отвори спирала на покачување на платите во Македонија. Со тоа, сега просечната плата е 24.548, а претходно беше 22,889. Дојдовме до просечна плата од 400 евра, ако треба железни опинци ќе облечам ама просечна плата од 500 евра мора да има. Ќе се фатиме за работа, ќе засукаме ракави и, како што вели канцеларката Ангела Меркел, ќе почнеме со „арбајтен“. Оваа година ќе има уште едно зголемување на минималната плата, а очекувам и побрз развој со членството на Македонија во НАТО, рече Заев на трибината, на која е и вицепремиерот за економски прашања Кочо Анѓушев.
Заев и Анѓушев, заедно со министерот за економија Крешник Бектеши беа и најголемиот светски политичко-економски собир во Давос. Заев рече дека забележал огромна разлика во односот кон Македонија во споредба со лани, каде за првпат се сретна со грчкиот премиер Алексис Ципрас.
-Нема кој не слушна за Македонија во Давос и за договорот со Грција, сите таму знаат дека влегуваме во НАТО и дека сме подготвени за развој на економијата, рече Заев.
Од денеска Владата на Република Македонија започнува со реализација на серија трибини со граѓаните и активности „Силна економија – шанса за сите“ преку кои во отворена дебата со граѓаните ќе се дискутираат економските остварувања и политики како и предизвиците и перспективите кои се отвораат за економски развој на земјата со членството во НАТО и започнувањето на преговори со ЕУ.