Попладнево во Тирана, македонска делегација предводена од премиерот Зоран Заев а во која се и вицепремиерот за европски прашања Никола Димитров и министерот за надворешни работи Бујар Османи, ќе остварат билатерална средба со Германската канцеларка Ангела Меркел.
Во рамките на оваа еднодневна работна посета, премиерот Заев ќе го посети и Македонскиот културен центар во Тирана, соопштуваат од Владата.
Посетата на Германската канцеларка Ангела Меркел на Тирана, каде што ќе се сретне со премиерот на Албанија, Еди Рама, а потоа ќе има заеднички ручек со шефовите на владите на земјите од Западен Балкан, по што ќе следат одделни средби со премиерите на Црна Гора, БиХ, Северна Македонија и Косово, од една страна се толкува како давање нов поттик на Берлинскиот процес отворен во 2014 година, а од друга само како обична проштална посета на Меркел која заминува во пензија.
-Свечениот пречек ќе биде пред Палатата на бригадите во 10:20 часот, по што ќе има одвоена средба со премиерот Еди Рама а потоа и билатерална средба на двете делегации, информираат од владината прес служба.
Нешто претпладне, според агендата ќе пристигнат премиерите на земјите од западен Балкан, по што ќе има заеничко фотографирање и одржување на планираната средба.
Ова е вторпат Меркел да дојде во Тирана, по посетата во јули 2015 година.
Поради посетата на Меркел државната полиција превзеде низа безбедносни мерки, од изменет сообрајќаен режим на повеќе улици во градот, до зголемено присуство на полициски службеници и засилена контрола при влез и при излез од Тирана.
Германската канцеларка Меркел во Тирана доаѓа по посетата на Белград, каде на заедничката прес конференција со претседателот Вучиќ, нагласи дека косовското прашање нема да исчезне и мора да се реши и дека некои прашања се решаваат на крајот од некој процес. Вучиќ нагласи дека Србија е свесна кој е условот за влез во Европската Унија.