Можно е, остварливо е, неопходно е обединување! „Барам поддршка од сите граѓани за нашата заедничка прогресивна иднина. За Скопје европски град, Скопје кое сплотува и работи за вас. За Северна Македонија европска држава, достојна членка на НАТО, меѓу демократските земји која испорачува мир, а сите ние европски граѓани. Можно е, остварливо е, неопходно е обединување“ порача премиерот и лидер на СДСМ, Зоран Заев на граѓанскиот собир на партијата во Скопје.
Тој ги повика сите на одважност и издигнување над себе и личните очекувања и побара кочниците кои сите ќе не вратат назад, да ги претвориме во силата која ќе повлече напред, бидејќи должност ни е да одиме напред. „Со еден чекор сме горе, на планината и ќе поставиме уште едно победничко знаме на слободата, напредокот и интеграциите. Но со другиот сме „низбрдо“, назад во 2016, а кој знае можеби и во 2001, во ризици, неизвесност криза и изолација“ кажа Заев.
Тој рече дека последниот сантиметар до целта е најтежок бидејќи успехот се чини на дофат и сме најкомотни и тогаш ризикот за да се лизнеме надолу е најголем. „Кочниците кои ни ги поставуваат другите и дома и надвор се тешки, но со нив знаеме да се справуваме. Но како ќе се справиме со самите себе кога на 1 ноември би се разбудиле со сознанието дека сами сме поставиле кочници на среќата на своето дете, на прогресивната иднина на својата земја и дека Скопје не го срушил земјотрес, туку од невнимание и разединетост преку Скопје не повлекле во провалија, тие кои го нагрдија и му ја одземаа душата“ рече Заев.
На трибината се обрати и кандидатот за градоначалник на Скопје, Петре Шилегов.
Дрита Ислами порача: да продолжиме да го развиваме Скопје, за да биде еднаков град за сите „Да продолжиме да го градиме и развиваме Скопје, за Скопје да продолжи да биде еднаков град за сите жители. Сарај и Скопје се мојот дом и драго ми е што тој дом постојано се развива и разубавува во последните четири години благодарение на градоначалникот Петре Шилегов“ кажа атлетичарката Дрита Ислами на граѓанскиот собир на СДСМ во Скопје.
Таа ги повика сите сограѓани Македонци, Албанци, Турци, Роми, Срби, Власи, Бошњаци и сите останати на 31 октомври да го поддржат градоначалникот Шилегов за Скопје да продолжи да се развива во следните четири години. „Атлетиката е индивидуален спорт, но за успех потребен е ангажман на други луѓе. Исто е и со градоначалникот, тој е еден, но зад него е негиовиот тим и ние граѓани со цел да постигнеме заеднички успеси“ кажа Ислами. Таа додаде дека каде и да оди низ светот кажува дека нејзиниот град, Скопје, прераснува во вистинска метропола и кажа дека е убедена дека под водство на градоначалникот Шилегов тоа ќе продолжи и во следните четири години, рече таа.